Piɛli tɔha ka piɛli nahu
Ŋuni n-lee nyɛ ma?
| Nuu tuunbaŋsim balibu | poetry  |
|---|---|
| Sabisabiri yuli | Emmanuel Issifu |
| Balli tuma bɛi balli yuli | Dagbanli |
| First line | Ŋuni n-lee nyɛ ma? |
| Last line | Ŋuni n-lee nyɛ ma? |
| Di sabimi niŋ | Dagbani Yɛltɔɣitaɣimalisi |
Mani n-nyɛ piɛli tɔha
Ka piɛli nahu
N nirilim ka zaŋ buɣisi
N jilima ka ŋmali
N suhuyubu ka baŋbu
Biɛɣu yi kaai
N gbuna chihiri kuɣa
Namda nyɛla n naba saandi
Ŋuni n-lee nyɛ ma?
Ŋuni n-lee nyɛ ma?
Mani n-nyɛ achocho
Baa napɔŋ
Taŋkpaɣu balibu kam
M puɣiri li
Mani n-nye tuuntumda
Tumdi ka ku deei yɔri
Tigbura bi kpɛri
N naba ni
Bɛ di yɛri kuɣa
Ŋuni n-lee nyɛ ma?
Ŋuni n-lee nyɛ ma?
Man’ kuli bɔri ka n wumla ʒii
Ka bɔri ka n wum kaɣibi
M bɔri ka n nyala lilibi
Ka n yiɣisi n-niŋdi looloo
N-niŋdi looloo n-kuni ya?
N niŋdi looloo n-kunila simliyili
N niŋdi looloo n-kunila daŋ dunoli ni
Ŋuni n-lee nyɛ ma?
Ŋuni n-lee nyɛ ma?
Tikubinaa lihi kilibikilibi,ka yuli garigari
Tikum niŋ m malifa
Malifa yi ŋme m-bi nyɔɣi
Bɛ mi ni wum vuri
Ʒiri din tuhi ,di so yɛlimaŋ’ gɔŋ
Dii niŋ n sua
A yi ti ŋme n -gbaai,ka n kɔrigi
Naŋgani din malisa,
Di ni birim niriba
Di yi niŋ jaambɔŋ,
Ni nti birim ba ka ku
Ŋuni n-lee nyɛ ma?
N niŋ looloo ti paai
Daŋ dunoli ni
N niŋ looloo ti paai simli shee
N ni wum kaɣibi la
N ni yɛli nyaɣibi
N ni nya lilibi la
N ni kɔrisi pa
Ŋun yɛli bi tim ma
Ŋun wum mi bi bɔhi ma
N tuɣiki simli
Ka wurim daŋ
Ŋuni n-lee nyɛ ma?