Yɛlitɔɣitaɣimalisi: Mali Tahama

Daŋ yibu pala daŋ kundi,

Daŋ chɛndi pala daŋ labbu,

Daŋ piligu pala daŋ naabu,

Daŋ tooni pala daŋ paabu.

Pa ŋun daŋ daani daguli

N-daŋdi naabu;

Pa ŋun daŋ ʒibu

N-daŋdi suubu;

Pa ŋun daŋ labu

N-bahindi ni lari;

Pa ŋun daŋ nintam pahibu

N-daŋdi puzuri kpuɣibu.

So' waɣinli lan min

Daŋ so'jii lan naabu;

Ban be nyaaŋa min

Daŋ ban be tooni paabu;

Ban yɔli ʒibu min

Daŋ ban daŋ ʒibu suubu.

Daliri pala daŋ tooni,

Daliri pala daŋ yibu,

Daliri nyɛla Wuni ni bɔri shɛli,

Daliri nyɛla Wuni zaligu,

Dailiri dumi ba Wuni saha,

Sal' daliri biɛɣu ʒin neei

Ka o bin pam lahi bɔrigi mɔɣuni;

Dama daliri biɛɣu yi neei di neei ya.

Daliri ni be shɛli,

Gbamdi ni paai o paabu shee;

Suɣlo mi n-daa dɔɣi kpɛm daliri,

Suɣlo mi ʒin be shɛli

Ka sal' daliri zani sɔli.

Naa Zilandi daa pun nyɛ ka yɛli -

Ni so min chɛn ka kumda

N-ti kun ka lari nyɛ yaɣi yaɣi;

Din zuɣu di che ka a zuŋɔ zaa shee

Che ka a yihi tahima;

Zaŋmi yɛlli kam jɛli Kpɛŋ'lana

Ka gbibi suɣlo ka suhiri daliri;

Dabsili kan na ka yɛlli kam

Ti ni ti tam kalli zuɣu.