Sayibu Adams

Ghana karachi kpɛma

Sayibu Adams nyɛla Dagbaŋ bilichina ŋun nyɛ karimba so ŋun che tuma ka nyɛ ŋun saɣisiri bihi ka di mali yaa pam. O yila Naabɔɣu din miri Savelugu la na. Niriba pam mi o la Sayibu Adam Wilberforce ka shikuru bihi pam mi tooi booni o Adam Biɛɣu.[1]

Piligu mali niŋ

Bɛ dɔɣila Adam Wilberforce la Naabɔɣu; o bayili m-bala. O ma yili mi n-nyɛ Gushee. Tinsi ayi ŋɔ zaa mirila Savelugu. O yab’ doo n-daa nyɛ Naabonaa Nabila.

Wilberforce mini Vonaa ŋun na diri ŋɔ daa laɣimmi mɔɣi bihi yini, ka laɣim pili shikuru chandi karimzɔŋ yindi ni. Sayibu Adams karimba kuro (Michael Mahamud), ŋun daa wuhi o karim duri ata (P.3) n-daa ti o yupaa boli o "Wilberforce" maa, domin o boli ŋmɛbo zuɣu.[1]

Baŋsim Bɔbu mali niŋ

Wilberforce daa pilila o primary shikuru Naabɔɣu. Tia gbunni ka bɛ shikuru maa daa be. O ni daa naai nimaani, Pong-Tamale Middle school ka o daa chaŋ. Maali anahi ka o daa chani tingban ni, n-chani shikuru maa ka kunna biɛɣu kam.

1970 yuuni ka o daa sabi Common Entrance ka daa paasi li n-daa chaŋ Yendi Secondary school din be Naya la. Bɛ bihi pisopɔin (70) n-daa be shikuru maa ni; bidibisi nɔli mi n-daa nyɛ bɛ zaa. O karimbitaba Yendi Secondary school maa ni n-daa nyɛ Jones Abu Alhassan (ŋun pa tumdi GFA la), Alhaji Mustapha Ali Iddrisu; ŋun daa namin nyɛ Tudu Yaɣili Fukumsi Kpambala (Northern Regional Minister) la, n-ti pahi Kpan Naa ŋun na diri ŋɔ.

O ni daa naai Naya shikuru maa o daa chaŋla Navurongo Secondary school n-ti niŋ o 6th Form. Yumaayi ka o daa niŋ ni.

1979 yuuni zaŋ chaŋ 1984 yuuni ka o daa niŋ o degree University of Cape Coast.[1]

Tuma mali niŋ

O nyɛla Karimba kuro.

O ni daa naai university, o daa kpalimla University of Cape Coast maa n-daa niŋ o "service", n-daa naai ka bɛ tahi o Ghana Secondary School din be Tamale ka bɛ ŋmaai li jia booni li GHANASCO la. Yuun' piniyini (11) ka o daa wuhi GHANASCO maa ka bɛ daa ti piigi o karimbakpɛma (headmaster) n-daa tahi o Pong-Tamale Secondary School (PONGTASS) 1997 yuuni. Yuma ayopɔin (7) ka o daa niŋ PONGTASS.

2004 yuuni ka o daa yi PONGTASS n-labi Kalipohini Secondary School (KALISCO). O kpaŋmaŋ ni ka bɛ daa ti lɛbigi KALISCO "boarding school". 2008 yuuni ka o daa yi KALISCO n-daa labi Northern School of Business (NOBISCO). Yuma anii ka o daa niŋ NOBISCO.[1] NOBISCO maa nyaanga ka bɛ daa lahi tahi o Tamale Senior High School (TAMASCO). Yuma anahi ka o daa niŋ TAMASCO ka daa che tuma .[1][2][3][4][5]

O namin lahi nyɛ zuɣulan' n-ti karimbanim nangbanyini laɣingu din yuli booni Conference of Heads of Assisted Secondary Schools (CHASS).[1][4][5]

Kundivihira mali niŋ

  1. 1.0 1.1 1.2 1.3 1.4 1.5 My Northern Achiever S2E06 https://www.youtube.com/watch?v=MjOEnL6HuQ8&t=6s Retrieved on October 7, 2020.
  2. Zadok K. Gyes. Encroachers take over lands belonging to TAMASCO (English). graphic online. Retrieved Oct - 19 - 2016.
  3. Yakubu Abdul-Majeed. Veep Cuts Sod for Construction of Dormitory, Bungalow for Tamasco (English). allAfrica.com. Retrieved 24 September 2019.
  4. 4.0 4.1 Franklin ASARE-DONKOH. Reopening of SHS in danger (English). Today online. Retrieved April 20, 2018.
  5. 5.0 5.1 Marian Ansah. CHASS demands release of feeding grant arrears (English). City News Room. Retrieved April 19, 2018.