Salinlɔha

Salinlɔha gbuuni

Salinlɔha nyɛla bɔh'ji' shɛŋa ti ni mali bɔhiri taba pɔi ka naan yi piini salima salimbu. Lala bɔhisi ni tooi nyɛ bachinima ŋan pe ka ka gbunni, ka lee mali labisibu. Labisibu maa din mali gbunni. Di daliri nyɛla di ku ban salindi ka wumdi salima lari ka bɛ nii nyam ka bɛ naan yi pili salima salimbu.

Ti mali salinlɔha m-maani salima salimbu shili.

Salinlɔha Balibu

1. Yoodara salinlɔha

2. Tuya duɣibu

3. Binkɔbiri kubu

Yoodara salinlɔha nyɛla bɔhisi mini ŋa labisibu ŋan piini salima salimbu.

Di shɛhira m-boŋɔ:

1. N lii        yil' bila buɣim

2. Mani n-chani ka di be nyaaŋa ka be n tooni     soli

3. Mani n-tim bia ka o bi labina        kuɣili labu

Tuya duɣibu di nyɛla bɔhi ŋmahi ka di labisibu gba nyɛ zaɣŋmahi. Di shɛrhira nyɛ

Bɔ n-lee be a nolini?    Tuya

Bɔ tuya?      Tuya bandi

Bɔ bandi ?   Bandi kulo

Bɔ kulo?      Kulo kpaam

Bɔ kpaam?      Kpaam dirigili

Bɔ dirigili ?     Dirigili saŋgali

Bɔ saŋgali?      Saŋgali suɣilo

Bɔ suɣilo?      Suɣilo kunkpe

Bɔ kunkpe ?    Kunkpe yɛmba

Bɔ yɛmba ?      Yɛmba paɣisara

Bɔ paɣisara?      Paɣisara dii

Bɔ dii?      Dii lam

Bɔ lam?      Lam tara

Bɔ tara?    Tara wubisi

Bɔ wubisi?      Wubisi chaɣila

Bɔ chaɣila      Chaɣila fio

Bɔ fio?      Fio gɔŋ

Bɔ gɔŋ?      Gɔŋ piti

Bɔ piti?    Piti zaa bala ka a nya a yaayoo.

Binkɔbiri kubu di nyɛla salinlɔha maa balibu la ni zaɣ' yini. Ti tooi mali li m-piini salima salimbu. Di ni niŋdi shɛm m-bɔŋɔ;

Ban salindi salima yino n-yɛn yɛli ni o ku wɔbigu ka so mi ŋmaligi yɛli ni wɔbigu maa pɔra. So mi ni yɛli ni o ku nahu. Lala ka salinsalindiba maa ku yɛn kuri hali ka so ti yɛli ni o ku salinsaa. Ka so mi yɛli ni kɔrigi salinsaa maa. Ka so mi ŋmaligi yɛli ni o yihi o gbali,  ka so yɛli ni ŋun fibigi o zuɣu, hali ka bɛ ti pirigi salinsaa maa naai ka pili salima

Salinlɔha Biɛhigu Bee Nahiŋgbana

1. Di yirila noli ni na

2. Di che ka bihi tɛha yɛligira

3. Di nyɛla biɛhigu puuni diɛma

4. Di tooi nyɛla bɔhisi mini labisibu

5. Bihi tooi yuri di lɔhibu pam bɛ yi ti laɣim

Salinlɔha shɛhira

Salinlɔha: Labisibu

1. "N lii?” Yil'bila buɣim

2. "N vim” Katiŋa taani

3. Mani n-gbubi n nimkpulli

Kpe hali ni Naya ka zoo

bi shihi li - Buɣumkpulli

4. Mani n-chani ka di yuuni ma

ka n ti labirina ka di yuuni ma - Voli

5. M ba m-mali o kpariba, bɛ yi zaya bɛ waɣimi gari taba, amaa bɛ yi kurim bɛ saɣimi - nubihi

6. Mani n-chani ka di be n tooni ka be n nyaaŋa -Soli

7. M parimparim ku nyaŋ du - Ŋuni n-na mi m-piri namda du tia

8. Nkaa katirikaa katirikaa katirikaa - Daantaligu ʒiri yɔɣira ka ʒiri gurilo ka ʒiri mɔri

9. Din barigi ka naa bo n-je - Shɛriga

10. M malila n tumtumdiba ata, yino yi kani bani maa ku tooi tum - Daankuɣa

11. Mani n-chani ka di be n tooni ka n-ti kunna ka di be n nyaaŋa - Shilinshia

Salinlɔha Daanfaani

1. Di tooi che ka bihi noya valigiri yɛltɔɣa

2. Di kpaŋsiri kaya ni taada

3. Di tooi yihiri bihi mini ninkura zaa ninsabigi ni

4. Di lahi nyamdi tuuntumdiba nii

5. Di tooi lahi pahiri bihi tɛha ni baŋsim

6. Di tooi lahi che ka salinsalindiba niŋdi shili