Salima:Sayibu Suhi yiɣ'si yaɣi zuŋo

E-Class

Sayibu Suhi yiɣ'si yaɣi zuŋɔ

JUUNA: Sayibu....Biɛla-biɛla, yi dabsili maa biɛɣu neemi maa. Biɛɣu biɛɣu bi che goli. SAYIBU: Lala n-nyɛli. Ti yi kuli nyu kom n-naai, Asibiri din be tuuli maa kani, din ti kanina n-bala. JUUNA: Din sani ka a yɛri ŋɔ? SAYIBU: Ka ti Dɔɣirikpiɛm' maa kpariyɛli maa ka a yɛri maa? Ma ti bapira maa kanibu n-daa parigi ti laasabu maa, ka che ma Kpini goli maa ni ka ti daa zali li. JUUNA: Aayi!...Pa a Dɔɣirikpiɛm kpariyɛli maa yɛltɔɣa kaman' yɛri a. SAYIBU: Ka dini? JUUNA: Tikuli dali maa, biɛla-biɛla, ma di biɛɣu kuli neemi maa. (Ʒii fɔhiya...So bi lahi yɛri shɛli) BABA: Ka wula ka ʒii maa ti fɔhi chichi lala ka timalan' n-kani ka bɛ garigi ti maa? SAYIBU: Di lee ku fɔhi lala, ma Juuna saɣim la ʒii maa. Do'so ŋun daa yi Anabi Yisa nyaaŋa maa, teemiya ma o yuli. BABA: Judas! SAYIBU: Nnabi Juuna judaasi ma mi maa. Hali o gari lala Judas maa tooni. Akai! N doo a bi mali. BABA: Ma ŋɔ ŋuna, teebu n-nyɛli ka o teegi a. Bee yɛltɔɣ'shɛli m-be gbunni ka ti bi mi? SAYIBU: Yɛltɔɣ'shɛli ka gbunni. Munaafiichi m-be di puuni. Yi puuni ŋuni n-lee mi ni m bi lahi lora. To din' ka o lo ni o nyihi ya ka tahi lala yɛltɔɣa maa na. BABA: Din ŋuna, nyini n-viigi a maŋ' gbuni maa, dama tinim' kuli nyami ka di nyɛla teebu. SAYIBU: A nyaya boo? To nin'mira yɛlmaŋli ka a ti maa. Yi zaasa, n baŋ ya. Yi zaŋ la tiŋ'ŋmarilim n-be ʒii ŋɔ maa puuni. Banim' n lɔri noli tikuli dali ka yi mi? Ka bihi ban zali bɛ noli soli? JUUNA: A ni yaa kpuɣi yɛltɔɣa maa shɛm maa, a zaŋ li n-yaɣi dini bi paagi luɣushɛli. Sahashɛŋa, a mali yɛl'dɔɣisa pam. SAYIBU: Di yaɣi lala. Dabsili dini ka n yɛli a ni Tikuli biɛɣu yi ti neera, nyin teemi ma? A ni nyihi tikum shɛli ŋɔ maa, kuli mali wɔra, n ku lahi bahi yɛda ni nyini. BABA: A gba bini maa kuli nyaŋmi pam. Pirigili bo m-bala ka a lora? SAYIBU: A yubu ka a bɔhi ma maa. Mira! Ka a kpee n nyɛ ma. A yi lahi bɔhima lala, ʒii ŋɔ ni bɔri. BABA: A mila n yuma ka baŋ ni ka n kpee n-nyɛ a? Nyin' yi niŋda, di ŋmanila a ko m mali suhi. Ʒii ŋɔ nyaɣisim ka ti zaa bɔra ka a kuli niŋdi lala ka ti shini maa, di pala so zɔri a mi. SAYIBU: (O vaai yiɣisi ka bɛ gbaagi o n-ʒili. O vuhiya fuu) N kuliya. JUUNA: Di saɣiya. ŋɔ maa zaa, n sani ka di yina. Man' di yɛlimi maa ni ti yaa zaŋ daai taba. Amaa dini chani shɛm maa, yimiya di yɛla ni. SAYIBU: Vu'shɛŋa yini bɔrima ka n shini maa, n jemi ni n niŋ ka di ŋmanila ti laɣimmi n-ʒiya ka ka nangbanyini. Ka che, ʒii ŋɔ zaa vull, ŋun yɛn tahi n kpali tiŋ' kani. Yi mi yi kuli yɛli ni ʒiri yin yiɣisimiya ka ti dahim taba yimba yimba. Bee ka yi ŋmaai ma jiya, "ti bi lahi bɔri a ʒii ŋɔ ni", ka n taɣi ʒishee. JUUNA: Di saɣiya! Ti timdi sandaani. So bi kariti a ʒii ŋɔ ni. A yi zo kpe, ma ʒii maa pa yɛn lurila wɔbili. BABA: To ŋ-ŋɔ maa ka yi yɛri ka o duri gaa maa. (O lari ka yɛra) Faashee ti ti kuli wɔbsi nyimsa ŋɔ fiɛbisi, n-yɔɣi a hali ka a ni ti ba jila. SAYIBU: (O gba lara) Ma din ŋuna tɔbu yɛltɔɣa ka a yɛli maa. Yaŋɔ naan zani dabari. JUUNA: Karikaɣali! Ka Rɔɔshiya mini Yukireen kuli ŋmɛri tab' buɣum ŋɔ ka a doya maa? SAYIBU: Ma dabiɛma nim' m-bala. Tinim' ŋɔ n ka di puuni ka di na bi maai maa. Lala tiŋsi ayi ŋɔ dahimbu nye minti ala? BABA: Amaa n yi nya a paɣa Shetu, ni yɛli o ka o baligi naanzua ni a bindirigu (o laya) SAYIBU: N yi garigi a, nyin bɔhimi ma. Niri yi doli a yɛltɔɣa, bɛ ni paɣi o chɛrisheeni.