Salima:Libgili mini Sinsabiga

Libgili mini Sinsabiga: Ti' shɛli n-daa be tiŋkpaŋ shɛli ka bia ŋun yuma daa nyɛ yuma ayi chani ti duri lala tia ŋɔ n-diri di wola saha kam. Lala bia ŋɔ yuli n-daa booni Libgili. Tia ŋɔ gba yuli n-daa nyɛ sinsabiga. Libgili daa yi du n-ti di n-tiɣi, o yɛn tɔhila di shɛŋa n-sheena ti ʒini sinsabiga ŋɔ gbunni n-vuhi. O vuhi naai nyaaŋa, o yɛn bahi di la o ni zaŋ shɛli sheena maa. Libgili daa yu sinsabiga maa diɛmbu pam dama a daa yi bɔ o je ka ti chaŋ sinsab' tia maa gbuni a ku kɔŋ o. Di zuɣu daa che ka sinsabiga maa gba maali suhupiɛlli saha kam. Libgili ni daa ti zoona, n-niŋ nachimbila o daa dii bi lahi nyari saha chani sinsab' tia ŋɔ gbuni ka bɛ ti diɛmda ka di daa muɣisi sinsabiga maa pam. Dahinshɛli ka Libgili ti labi tia ŋɔ gbuni, ka sinsabiga ŋɔ lihi Libgili nini polo ka baŋ ni muɣisigu paagi o. Sinsabiga daa boli o, Libgili kamna ka ti diɛm di yuuya pam ka ti diɛm. Di saha ka Libgili labisi o ni, Baŋmi ni pa bia n-lahi nyɛ ma di zuɣu m bi lahi diɛmdi tihi, m pa bɔrila liɣiri ni n da duu nɛma ni dunia namtɛri. Sinsabiga ŋɔ daa labisi o ni, N zo mi ka liɣiri din ni ti a ka da lala binyɛra ŋɔ maa zaa, tɔ amaa a ni tooi tɔhi n wola (sinsaba) ŋɔ n-chaŋ ti kɔhi da lala binyɛra maa. Libgili suhu daa paligiya pam o ni daa yɛli o shɛm maa ka o daa tɔhi sinsab' wola maa zaa n-chaŋ ni suhupiɛlli. Di daa lahi niŋ yuma ashɛm ka Libgili bi lahi yi sinsabiga ŋɔ zuɣu ka sinsabiga suhu saɣim yaha. Libgili ni daa ti bi doo zaa, o daa lahi chaŋ sinsabiga ŋɔ gbuni dahinshɛli ka sinsabiga nya ka o suhu lahi paligi. O daa lahi boli o, N zo kamna ka ti diɛm di niŋ dabisa pam n nini ni pali a. Libgili daa labisi o ni, M ka saha ni n diɛm, m bi lahi diɛmdi tihi m pa bɔrila yili ni n zaŋ dɔɣim ka ti kuli di puuni a ni tooi sɔŋ ma?". Sinsabiga ŋɔ gba daa labisi o ni, "N zo m mi ka yili din ni ti a mini a dɔɣim ŋɔ amaa ŋmahimi n wula ŋɔ zaa n-chaŋ ti mɛ a yili maa n-zaŋ a dɔɣim ka yi kuli n ni maali sɔŋsim shɛli m-bala." Libgili suhu daa lahi paligiya pam sinsabiga maa ni yɛli o shɛm maa ka o daa ŋmahi tia maa wula zaa n-chaŋ ka bi lahi labina. Sinsabiga ŋɔ daa kuli kpalim ʒila wuntaŋa saha shɛli kam ka tulim kam paari o. Dahinshɛli wuntaŋ' ni ka Libgili ti lahi labina sinsabiga ŋɔ gbuni ka o nini polo yaa lahi taɣi. Sinsabiga daa lahi boli o, "N zo kamna ka ti diɛm, n ko n- kpalim nyɛ ma a ni daa kuli ŋmahi n wula yuma ata din garila hali ni zuŋɔ, so bi lahi miriti ma yaha di zuɣu saha shɛli kam suhusaɣingu ni biisim ni ka m pa be". Libgili gba daa lahi labisi o ni, "N yi pa gbaarila kpamli di zuɣu m bɔri ni n doli ko' soli n-chaŋ ti vuhi, di zuɣu sɔŋmi ma ka n nya ŋaruŋ". O yɛltɔɣa ŋɔ nyaaŋa, sinsabiga daa yɛli o, "N zo n yuri a pam ka bi bɔri din yɛn dam a, di zuɣu ŋmaami n shee ŋɔ m-maali ŋaruŋ chaŋ a chandi maa". O suhu daa lahi paligiya pam sinsabiga ni daa yɛli o shɛm maa ka o daa ŋmaai sinsabiga maa wulikpani (shee) m-maai ŋaruŋ n-chaŋ o chandi maa ka bi lahi labina. Yuun' gbaliŋ ka Libgili daa niŋ nimpolo n-ti labina n-lahi kana sinsabiga ŋɔ gbuni. Sinsabiga ni daa nya Libgili o daa yɛli o, " N zo n lahi ka binshɛli din yɛn ti a, wola lahi kani" Libgili daa labisi o ni, "N gba lahi ka nyina din ni dim gba". Sinsabiga daa lahi yɛli o, "Wula lahi kani, hali n shee gba lahi kani". Libgili gba daa lahi labisi o ni, "N gba pa kurigi yaɣi tia dubu". O daa lahi yɛli Libgili ni, "Din kuli kpalim ma ka n ʒiya ŋɔ nyɛla n piligu wula ŋɔ di zuɣu n kuli ku lahi tooi niŋ shɛli". O ni daa yɛli lala yɛltɔɣa ŋɔ ti Libgili naai, nintam daa yirila o ninni na. Libgili daa yɛli o ni, "Pa binshɛɣu ka n gba lahi bɔra, n ni pa bɔri shɛli nyɛla luɣ' shɛli ni yɛn ʒini vuhi ka bi lahi chaŋ shɛli dama wumsim gbaai ma pam zuŋɔ yuun' gbaliŋ maa". O yɛligu ŋɔ daa paligi sinsabiga ŋɔ suhu pam ka o yɛli, "Mbo! Tia wulikura gbuni n-tu ni a ʒini n-yuli li viɛnyɛla ka baŋ biɛhigu di zuɣu n zo kamna ti ʒini baɣili ma m-pa vuhi". Libgili gba suhu daa paligiya pam o zo ni taɣi deegi o shɛm maa ka daa ʒini baɣili o ni nintam o ninni.

Biɛhigu puuni, salinli ŋɔ ni tia maa ŋmanila ti laamba. Ti yi na nyɛ bihi, ti mini ti laamba bɔri diɛma pam. Amaa ti yi zoona, ti bi lahi kaari ba naɣila a yi ti bɔri binshɛli bee muɣisigu yi ti paagi a ka a kana bɛ sani. Ti laamba bɔri ni bɛ nyari ti ka ti maali suhupiɛlli pam, di zuɣu taali kam ka a yi tum ba ka ti bɔri champaŋ, bɛ ni che ka sɔŋ a din kuli yɛn che ka bɛ nya suhupiɛlli a nii. A ni tɛhi ni Libgili niŋdila tia ŋɔ fitina, amaa lala ka ti shɛba niŋdi ti laamba. Ti nini bi tiɣiri bɛ ni tiri ti shɛli naɣila bɛ ti lahi kani. Ti baŋmi ni kpem' dɔndaliya so kpem' gballi n-doya ŋɔ. M paɣiya🙏