Matilda J. Clerk

Matilda Johanna Clerk nyɛla paɣa so bɛ ni daa dɔɣi Ghana tingbani puuni, nashaara goli March dabaayi (March 02) yuuni 1916. O daa nyɛla ashibit ti'tibira baŋda ka lahi nyɛ Tabibi bɔhimbu yaɣili Karimba. Ŋuna n-nyɛ tuuli paɣa Ghana tingbani puuni n-ti pahi gbansabila tingbana din be wulinluhili yaɣili puuni ŋun karim shikuru hali n-ti deei shɛhira gbaŋ shɛli bɛ ni boli 'Postgraduate Diploma'. Ŋuna n-lahi pahiri paɣaba ayi Ghana tingbani puuni ŋun deeigi Anashaara ti'tibira baŋsim, ka lee pahiri buta zuɣu di yi kana gbansabila tingbana din be wulinluhili yaɣili.

O ba ni o ma

Bihi piriba Matilda Johanna Clerk zoligu nyɛla din pi tiŋ' yuli booni Larteh, din be Akuapim zoya la zuɣu. O ba, Nicholas Timothy Clerk (1862 - 1961) n daa nyɛ ŋun kpa bidibsi ko kariŋzɔŋ shɛli bɛ ni boli Presbyterian Boys' Secondary School din tampuɣili daa sɔŋ yuuni 1938 la.

O ma mi n-daa nyɛ Anna Alice Meyer (1873 - 1934). O yaɣ'yini daa nyɛla Ga-Adangme ka yaɣ'dini la mi nyɛ Danish.

O kariŋ bɔhimbu ni baŋsim bɔbu

Bihi piriba ŋɔ pilila o kariŋ bɔhimbu kariŋzɔŋ din yuli booni Adawso Presbyterian School ka tirisi tooni n-ti tuɣi o 'Middle School' kariŋ bɔhimbu Aburi Presbyterian School din daa nyɛ bipuɣinsi ko kariŋzɔŋ la. Lala kariŋzɔŋ ŋɔ puuni ka o baŋsim ni o kpaŋmaŋ' du gaa hali ka o karimbanim' ti pa o yupaa ni "Dux of the School".

Din nyaaŋa, o daa tuɣi o kariŋ bɔhimbu Achimota kariŋzɔŋ'karili la puuni ka di nyɛla Cadbury nim' sɔŋsim puuni. Achimota kariŋzɔŋ maa puuni ka o daa deeigi shɛhira gbana din nyɛ; '2nd Division Teachers' Preliminary Certificate' yuuni 1935, n-ti pahi 'Cambridge Senior School Certificate' yuuni 1937, ka daa lahi karim siɣisi karim bɔhimbu yaɣ'shɛli bɛ ni daa boli 'Intermediate Preliminary Course in Medicine' yuuni 1942. Lala kariŋzɔŋ ŋɔ puuni ka o daa lahi bo soya m-pahi o baŋsim zaŋ kpa 'Physics', 'Chemistry', 'Botany' n-ti pahi 'Zoology' kariŋ bɔhimbu yaɣa.