Alizama- Sayibu mini Juuna

ZUŊƆ, TI YAA BƆBILI GBAAI SAYIBU

(Sayibu chaŋ o yil'kpiɛrilan' Juuna yiŋa ka bɛ puhi taba naai ka gbubi alizama)

JUUNA: Ndoo! Dabaayi ŋɔ a niŋ shaara. A paɣa bi yɛli a ni n-daa kpɛna m-bɔhi a yɛla?

SAYIBU: Aai! Ka Shetu mi, daadam m-bɔŋɔ? ŋun yɛltɔɣa bihi m-bɔŋɔ. To ʒiya ka n kuli ti yɛn bɔhi o, o kuli yɛn nyɛla noli maa buɣi-buɣi-buɣi.

JUUNA: Paɣaba ŋɔ ŋuna, lala n kuli bala luɣulikam. Fashee suɣulo. N na bɔhiri a. Vo' dini puuni ka a zo n-kpe?

SAYIBU: Ndoo yuuni ŋɔ noli maa ni wuhiri di ninkuunsi shɛm maa, shee ti gba baŋla so'ŋmara. Tamale ha, Alahaʒi Yakubu jia jiŋli maa ni ka mani kahi n ŋman'gura mini n sompoya kuli. Ma di mali la nashaara kikaa. N yɛrila ɛɛkɔndiisa. Man' yi kuli chaŋ n-ti nahigi dɔni di puuni, faashee Mangaribi, ka n larigi noli, ka gbaai yiŋ' soli.

JUUNA: Ooi! Ka a kuli yi yaŋɔ hali ni Tamale Alahaʒi Yakubu jia jiŋli maa ni? A daha.

SAYIBU: Ka di sɔŋsim maa kala zaŋ buɣisi. Sɔha maa ŋun gba, bɛ sa mooni Lahasari ka man' neei gɔm ni bɔhi ye ti lahi yɛn labimi m-puhi Azafari maa yɔɣɔ.

JUUNA: Ka di yi nyɛla maasim ŋɔ zuɣu, ma a yi kuli kpuɣi bindoo n-kpe moongu tihi ŋɔ puuni, a yɛn nyɛla ti mahili gbunni dɔni.

SAYIBU: To wumma! Pa maasim ŋɔ ko. Larigibu saha yaa, ko'piɛlim maa balibu balibu n-nyɛli. Ka bɛ pe binwɔla n-zali zali. Nyama! Kodu piɛɣu zami, ka watamilo piɛɣu ʒiya, n-ti pahi dobino ni gɔnda piɛri. Ti yi tɔm puhi Mangaribi naai, ka bɛ yihi teekaawee nim' na. Di yi pa shinkaafa, naɣila bonku bee nyuli. Nyin' gba yi paai yiŋ' na n-ti pɔbigi li ka di kamshi to a, a na kuli yɛn vali la ninto'kom ŋɔ kpuɣib-kpuɣib poi ka di naan-yi paai a noli ni.

JUUNA: Kaai! N zo ŋɔ yu nuɣa ni be shɛli.

SAYIBU: Dali maa ni ŋun gba, bɛ daa ti ti bindirigu maa, ka lahi ŋmubigila sokam tuhili tuhili.

JUUNA: Boo! Luhimi ma lahabali.

SAYIBU: Zabzugu nim' shaara. "Man' ku lahi garigi a".

JUUNA: To amaa che ka n yɛli a yɛlmaŋli. A yaɣi lala niŋsim maa. Niribi yi wum li, di be gala.

SAYIBU: Ka di nyɛla dini zuɣu? N ni kali a binshɛŋa maa zaa, di dini ka m mali? Chɛlima nyamm. Yuuni ŋɔ noli maa ŋuna, sokam ni o ni yɛn niŋ shɛm ka o mana da. Bozuɣu ka kum yɛn mali a ka a piriti a puli?

JUUNA: To a ni ku wum yɛlmaŋli ŋɔ maa n galim a.

SAYIBU: Aayi! M bɔhigu maa ka m bɔri ni a labisi. Zaa m-bala.

Kundivihira mali niŋ